Marco MorelliEntertainer Postfach
> Aktuell |
|
Morelliblög10 Februar 2007 Dr Adolf Ogi u igAes isch scho ä Cher här, da han'i als Entertainer amene
Geburtstagsfescht gschaffet. Aus Gascht isch denn o dr Alt- Bundesrat Adolf Ogi dr'bi gsi u dä het ä wahnsinnigi Lobesred übere Jubilar u Gaschtgäber usegla, het sini Verdienschte im Sport usw. gwürdiget u i Superlativene über ds Geburtstagsching gschnuret. Aes paar Schtung später, so irgendwo zwüsche Dessert & Schnaps, han' ig mis Schlussnümmerli gmacht u dert no ä Textschteu us "Was ihr wollt" vom Shakespeare, wo ig in Weimar obe mau d'Rolle vom Narr ha dörfe schpiele, igflochte u die geit folgendermasse: Herzog: Dich kenn ich. Wie geht's dir, alter Junge? Uf dä Text abe isches im Saal mugsmüsli schtill gsi, 5 Sekunde, 10 Sekunde, mä hät schier ä Nadle köre ufe Spannteppich flüge, so schtill isches gsi. Mir isches de o langsam ä chli gschmuech worde u plötzlich han'i gseit: Ja, mini sehr verehrte Dame & Herre, jitz schwiget' Dir! So het sich dr Chrampf glöst u sie hei chönne afa lache – u i ha mir mini Sach dänkt: Danke und weiter so, Shakespeare! Eh ja, Ogi het sich verbisse, nid nume im Sport, o i dr Meringue – säuber tschuld het är so übermässig vieu Mayonnaise drüber gschüttet. Morelli um 13:42 Uhr
Ds Dori Schär u igVor vielne Jahre han'ig d'Ehr ka mit lokaler u kantonaler Polit-
Prominänz dr erschti Verkehrskreisel mit Kunst am Bau (Gestalter René Ramp) in Bern-Liebefeld dörfe idsweie. Aes isch ä troschtlose Alass gsi, wills i Schtröme grägnet het. Am Rand vo däm Kreisel schteit äs Kioskhüsli mit Flachdach u dert obe bin'i mit däne Politiker im Räge gschtange u unger üs ds Fuessvolk i Pellerine u mit Rägeschirme. Die dennzumaligi Berner Regierungsrätin Dori Schär schteit grad näbe mir, i nime äs Funkmikrofon u tue ä so, wie wenn ig mit Ihre würd äs vertiefts Gschpräch füere u de säge i zur awäsende Zueschouermasse: "Wärts Publikum, d'Frou Schär het mir jitz grad beschtätigt, dass dr Verkehr tatsächlich zuenimmt, o nach dä Wächseljahr". Ds Dori luegt mi konschterniert a, brucht äs Zytli, fat aber afa lache u d'Gescht im Parterre hei o fei chlei Spass ka. So eifach isches mängisch u het mi ersch no ä chli für aui mini Zytigszoubertricks entschädiget, wo im Räge hei schlapp gmacht. Morelli um 13:40 Uhr
D'Elisabeth Zölch u igVor vielne Jahr ha ig als Entertainer-Pajass & Moderator amene Gwärbverbands-
alass gschaffet. Zwüsche Apéro u äm erschte Aessensgang hets no 10 Redner gä, won'i ha chönne asäge. U wius ke Bühni het gha, han'i mir vorgno, dass jede Redner uf mis chline Schämeli söu schta, wieu d'Zueschouer vom Redner de grad ä chli me gseh aus nume dr Chopf u das schlussändlich o äm Redner u sire Konzentration dienet. Die erschti Person won'i ha dörfe asäge isch die dennzumaligi Berner - Regierungsrätin Elisabeth Zölch gsi, aber die het partout nid uf das chline Schämeli ufe wöue. Aber i ha mir öpis überleit u därum hets mi gwautig agschisse, dass die aus Erschti grad so zickig tuet u de hase haut a Ihrne adrette Füdlibacke packt use uf ds'Schämeli ufeglüpft. Aes isch aues ganz schnäu gange. 3/4 vo de Gäscht het lut useglachet, 1/4 isch konschterniert gsi. D'Frou Zölch het lut usegöisset u schlussändlich de o glachet - ja, was söu Sie süsch. Uf jede Fau isch Sie ufem Schämeli blibe u die nächschte Redner si vo säuber druf. Aes paar Jahr später ha ig im Aemmital ire bekannte Wärchzüg-Fabrik are Jubiläumsveranschtaltig aus Komödiant äs Engagement ka. Im Vorfäld vo däm Event, han'i verno, dass o d'Frou Zölch wieder mit ämene Referat ds'Gast sig. Offebar het o Sie um mini Awäseheit gwüsst u het überne Mittelsma la mitteile, dass Sie de nid wieder vom Herr Morelli wöug agseit wärde. Jä nu haut, das chan'i akzeptiere. Nacheme Showblock uf dr Verladerampi vor Fabrik, ha'ni die ganzi Gsellschaft ufene Spaziergang zum nahglägne Schuelhus mitgno u ungerwägs no äs paar chlini komödiantischi Interventione igflochte. U bis au die viele Lüt i däre Aula hei Platz gno ka, han'i uf dr Bühni obe amene schöne Flügel no ä chli blueset. Ir erschte Schtuelreie ha'ni mir vorhär no ä Platz reserviert, schön ir Mitti u dert bin'i de schlussändlich, zwe Meter vorem Rednerpult, häregsässe! Ds Wirtschaftsreferat vo dr Frou Zölch isch öpe 25 Minute gange u so lang han'i Sie, ohni mit ärä Wimpere ds'zucke, i de Ouge fixiert. Ja, i weiss, das isch fies, will Sie isch tatsächlich i mi Bann grate u het eigentlich schier nume no mi agluegt u zu mir gredt, obschons im Saal öpe 200 Zuehörer het ka. No mau äs paar Jahr später, schaffe ig aus Komödiant, im Oberaargau are Neubau-Iweihig vor'ä grosse High-Tech Bude. 1'500 Gescht si glade gsi. I dr Phase vom Apéro bin'i aus komische Chäuner mit Champagner ungerwägs u im Igangs-Berich, wo eis Gedränge isch gsi, han'i ä nöi Fläsche wöue uftue u will die offebar isch gschüttlet gsi, isch mir vo däm Schumwy vieu usegschprützt. I ha d'Bsuecher usenander drängt u ha mit ärä Chride ufem Gussasphalt aui Champagner-Glungene ikreiset, nummeriert, u d'Gescht inschtruiert, uf dass niemer driine tschaupet. Wo n'ig am Bode unger das ganze Ritual ha beändet ka u wieder ha wöue ufschta, si grad näbe mir zwöi eleganti Dameschue u drinn schtecke zwöi schöne Wadli. A däne han'i mi ghäbt u mi langsam ufgrichtet u mi ufetaschtet, verbi a zwöi zierliche Chnöi, witer obe zwöi amächeligi Oberschänkle, äs guets Füdle, de dr Buch - i ha ja ungerwägs bim chlätere nid gwüsst, was mi de obe für'nes Gsicht erwartet. I ha dä Körper fescht i mim Griff ka u won'i de o gschtange bi, gsehn'i ersch, dass ig d'Frou Zölch umarme. Mir si beidi rasch verchlüpft, aber gli hei mir üs härzhaft aglachet u i ha zue're gseit, dass ig ächt erfreut sig, Sie wieder mau ds träffe. Ihre Schofför & Bodygard isch perplex u schtumm wiene Fisch dr näbe gschtange. D'Red wo Sie de später no het gha, han'i nid aglost, han'i vor Jahre scho zwöimau kört. Aus Künschtler isch'me ja eigentlich nid säute, ä chli ds' Arschloch vo däre Gsellschaft. Aber öpe mau gits sogar imene Galauftritt äs nachhaltigs Fröideli, wie z.B. die "Zölch-Trilogie". Eh ja, meh aus dr A-Narr ligt eh nid drinn, ä Schteigerig wär höchschtens no Dynamit. Morelli um 13:34 Uhr
Dr Erich von Däniken u igVor vielne Jahr han' ig als Entertainer und Moderator amene Chunde-
Alass vore Software-Bude gschaffet u unger angerem ä schwizerischi Bekanntheit dörfe asäge wo ä Vortrag het wöue cho ha. U de han'i gseit: " Sehr verehrti Dame u Herre, liebi Ching, (äs het keni ka, aber das sägi immer) äs isch mir äs speziells Vergnüege u ne grossi Ehr, euch ds' männliche Pendant vom Trudi Gerster dörfe vordsschteue u da ischer: Dr Erich von Däniken." Aer tschaupet usem Vorhängli use, luegt mi bös a, i luege fründlech zrügg...u d'Zueschouer hei glachet. Si Himu-Heiland-Stärne Vortrag über Usserirdischi isch de o guet acho. Aer isch ja o ä guete Schnuri u mit däne Bildli uf dr Linwand, wo är mit em Laser-Pointer rutiniert kommentiert, het är die PC-Heinis guet im Sack ka. So oder so, nachem Mysteri-Flop ersch rächt, - är isch ä einsame Plouderi - im Gägesatz zum Trudi Gerster, die touret zur Zyt i beschter Gsellschaft dür d'Dütschschwiz u verzeut o so Märli für Erwachseni. Morelli um 13:18 Uhr
kürzlich geschrieben... |